Адпаведнае рашэнне прыняло Міністэрства адукацыі Рэспублікі Беларусь. Цяпер падрыхтоўкай, захоўваннем і дастаўкай алімпіядных заданняў для трэцяга і чацвёртага (заключнага) этапаў рэспубліканскай алімпіяды зоймецца Рэспубліканскі інстытут кантролю ведаў (РІКВ), паведамляе pravo.by па инфармацыi газеты «Звязда».

Фактычна цяпер на этапе распрацоўкі, тыражавання і дастаўкі матэрыялаў школьных алімпіяд будуць выкарыстоўвацца такія ж тэхналогіі, што прымяняюцца пры арганізацыі ў краіне цэнтралізаванага тэсціравання.

РІКВ, у прыватнасці, будзе весці ўлік аўтараў, якія маюць вопыт у распрацоўцы алімпіядных заданняў, фарміраваць электронную базу такіх заданняў па кожным вучэбным прадмеце, заключаць дагаворы на іх распрацоўку.

Распрацоўшчыкі, у сваю чаргу, абавязаны будуць забяспечыць канфідэнцыяльнасць алімпіядных заданняў і іх тэматыкі з моманту пачатку работы над імі.

Не пазней чым за месяц да пачатку адпаведнага этапу рэспубліканскай алімпіяды распрацоўшчыкі прадстаўляюць заданні ў РІКВ. Тут іх тыражуюць у адпаведнасці з заяўкамі, раскладваюць у пакеты і захоўваюць.

Напярэдадні алімпіяды заданні дастаўляюцца фельдʼегерскай сувяззю ва ўстановы адукацыі, якія вызначаны месцам яе правядзення, і захоўваюцца ў апячатаных памяшканнях (сейфах). Раздрукоўвацца заданні будуць прадстаўнікамі аргкамітэта адпаведнага этапу рэспубліканскай алімпіяды толькі ў прысутнасці яе ўдзельнікаў.

Нагадаем, што ў папярэднім навучальным годзе Міністэрства адукацыі Рэспублікі Беларусь устанавіла парушэнні ў правядзенні рэспубліканскай алімпіяды па геаграфіі. У прыватнасці, быў пацверджаны факт уцечкі інфармацыі пра алімпіядныя заданні заключнага этапу.

Падрыхтавала Наталля СМІРНОВА