У Беларусі стартавала традыцыйнае духоўнае падарожжа, якое праходзіць напярэдадні Дня беларускага пісьменства.
 
Па сваім першым маршруце экспедыцыя прайшла трыццаць тры гады таму. Тады яе арганізатары задумалі сабраць невялікую групу энтузіястаў, каб з лампадай, у якой гарэў Жыватворны агонь ад Труны Гасподняй, і з цудатворнай Загор’е-Сталовіцкай іконай пабываць у розных гістарычных мясцінах Беларусі.
 
Перад стартам маршруту, які быў дадзены сёння ў Мінску, адбыўся малебен з удзелам Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі.

…Першым месцам прыпынку ў пілігрымаў, па традыцыі, стаў Баранавіцкі раён, а дакладней – Святое Поле каля вёскі Загор’е. У гэтым месцы, па волі лёсу, у розныя стагоддзi адбываліся цяжкія і кровапралітныя баі. Менавіта тут у 1983 годзе быў знойдзены цудатворны абраз.

 
Прывіталі на баранавіцкай зямлі ўдзельнікаў экспедыцыі намеснік старшыні Баранавіцкага райвыканкама Міхаіл Барысевіч і сакратар Пінскага епархіяльнага ўпраўлення, благачынны Баранавіцкай акругі Віталь Лазоўскі.

На Святым Полі ў памяць аб загінулых воінах адбылася сумесная малітва.

Удзельнікі экспедыцыі пераадолеюць каля 1,2 тыс. кіламетраў.

Пасля Баранавіцкага раёна «Дарога да святыняў» працягнула свой маршрут: Беразіно – Клічаў – Бабруйск – Магілёў – Горкі – Мсціслаў.  Канечным пунктам стануць Касцюковічы – сталіца Дня беларускага пісьменства ў гэтым годзе.

Іна ГАНЧАР

Фота Барыса НАВАГРАНА