Трыццаць два гады назад экспедыцыя прайшла па сваім першым маршруце.
Тады яе арганізатары задумалі сабраць невялікую групу энтузіястаў, каб з лампадаю, у якой гарэў жыватворны агонь ад Труны Гасподняй, і з цудатворнай Загор’е-Сталовіцкай іконай пабываць у розных гістарычных мясцінах Беларусі, сустрэцца з жыхарамі, пачуць ад іх апавяданні пра родны край, а таксама падзяліцца сваімі ведамі. У склад экспедыцыі ўвайшлі вядомыя гісторыкі, пісьменнікі, дзеячы мастацтва, навукоўцы-тэолагі і святары. Такой жа мэты «Дарога да святыняў» прытрымліваецца на працягу ўсяго часу існавання.
Перад стартам маршруту, які быў дадзены ў Мінску, прайшоў малебен з удзелам Мітрапаліта Мінскага і Заслаўскага Веніяміна, Патрыяршага экзарха ўсяе Беларусі. Ён адзначыў, што ўдзельнікі экспедыцыі паспрабуюць наведаць як мага больш населеных пунктаў і правесці сустрэчы з людзьмі, закранаючы тэмы духоўнасці, маральнасці і патрыятызму. “Тэмы любові да Айчыны, гісторыі, культуры нашай краіны, роднай мовы. Гэта ўсё тое, што аб’ядноўвае людзей, і такія сустрэчы патрэбны”, – падкрэсліў ён.
Са словам на дарогу да ўдзельнікаў таксама звярнуліся міністр інфармацыі Марат Маркаў і намеснік Упаўнаважанага па справах рэлігій і нацыянальнасцей Сяргей Герасіменя. Таксама ў рамках пачатку экспедыцыі было падпісана пагадненне аб супрацоўніцтве паміж Міністэрствам інфармацыі Рэспублікі Беларусь і Беларускай праваслаўнай царквой.
Першым месцам прыпынку ў пілігрымаў стаў Баранавіцкі раён, а дакладней – Святое Поле каля вёскі Загор’е.
Хаця поля з такой назвай на картах не існуе, але аб ім добра ведаюць многія. Менавіта тут, па волі лёсу, у розныя стагоддзi адбываліся цяжкія і кровапралітныя баі. Менавіта тут у 1983 годзе быў знойдзены цудатворны абраз.
Павіталі на баранавіцкай зямлі ўдзельнікаў экспедыцыі намеснік старшыні Баранавіцкага райвыканкама Міхаіл Барысевіч і старшыня Сталовіцкага сельвыканкама Мікалай Грыбаў.
На Святым Полі ў памяць аб загінулых воінах адбылася сумесная малітва. “Дарога да святыняў” працягнула свой маршрут: Зэльва – Казлоўшчына – Дзятлава – Ашмяны – Іўе, а апошняй кропкай 6 верасня стане Ліда – сталіца Дня беларускага пісьменства ў гэтым годзе.
Іна ГАНЧАР
Фота Барыса НАВАГРАНА
