На свята фальклору “Напевы зямлі маёй” і адкрытую ярмарку рамёстваў у аграгарадок Русіно з’ехаліся спевакі і танцоры, майстры-рамеснікі, гледачы з Баранавіцкага, Ляхавіцкага, Пінскага раёнаў. Такое значнае свята праходзіць у раённым цэнтры рамёстваў ужо восьмы раз.

Ярка і запамінальна адкрылі яго харэаграфічнай замалёўкай “Паслухай, што гавораць рушнікі”, дзе былі прадстаўлены ўнікальныя тварэнні рук народных майстроў розных рэгіёнаў.– Сёння ва ўсіх прысутных ёсць цудоўная магчымасць дакрануцца да народных традыцый, пачуць беларускі фальклор, разам з майстрамі стварыць прыгожыя вырабы сваімі рукамі на майстар-класах, – адзначыў намеснік старшыні Баранавіцкага райвыканкама Міхаіл Барысевіч. І сапраўды, уразіў талент спевакоў, танцораў і гарманістаў, душэўнасць падрыхтаваных нумароў. З вялікай павагай прадставілі на святочнай сцэне прыпевачніц Вольгу Лук’янчык і Святлану Кашча, музыкантаў Юрыя Усакоўскага і Анатоля Філанчука. Менавіта яны сталі пераможцамі і прывезлі ў раён дыплом І ступені з VII абласнога свята-конкурсу “Грай, гармонік! Звіні, прыпеўка!”.

Госці змаглі пазнаёміцца з народнымі строямі. Супрацоўнікі раённага цэнтра рамёстваў зрабілі рэканструкцыю баранавіцкага строю і на свяце прадставілі яго.

Стварылі строй майстры Перхавіцкага цэнтра культуры і народнай творчасці. Кашулю і фартух вышыла Валянціна Прыход, спадніцу выткала Марыя Малахвей.

Здзівіла разнастайнасць беларускіх страў, якімі частавалі гасцей на кірмашы. Тут і духмяная каўбаска, і блінцы, і гуркі – выбірай на свой густ. – Добра, што столікі паставілі на вуліцы, адразу каля тарговага павільёна спажывецкага таварыства, можна пасядзець, адпачнуць, – дзеліцца ўражаннем Святлана. – Мы на свята ўсёй сям’ёй прыехалі з горада Баранавічы. Нам вельмі спадабалася. Захапіў і кірмаш рамёстваў, і цікавыя выставы.Дзеці з задавальненнем малявалі, фатаграфаваліся ў спецыяльна арганізаваных зонах і атрымлівалі падарункі за адказы на пытанні бібліятэкараў. Дарослых зацікавіла латарэя без пройгрышу, продаж вырабаў з дрэва, саломы.    Усе жадаючыя маглі ўзяць удзел у майстар-класе па кузнечнай справе.

 

Так, з любоўю да сваёй зямлі, песні матчынай, мовы беларускай спявалі, танчылі, адпачывалі ў аграгарадку Русіно.

Таццяна Карпік.
Фота i вiдэа аўтара.