Здаецца, самай значнай адзнакай годнасці чалавечага жыцця з’яўляецца памяць аб ім яго нашчадкаў. Канешне, кожны з нас пакідае свой след на гэтай зямлі. Светлы вобраз аднаго чалавека застанецца ў памяці дзяцей і ўнукаў, другога будуць памятаць як таленавітага творцу ці адданага сваёй справе дзеяча. Але ёсць сярод нас людзі, якія сваім талентам, адносінамі да людзей і працы заслужылі не толькі добрую памяць родных, але і шчырую ўдзячнасць ўсіх прыхільнікаў іх літаратурнага дару. Менавіта такім людзям былі прысвечаны V Корнеўскія чытанні «Вашы зоркі не згаснуць ніколі», што ў чарговы раз прайшлі на базе цэнтральнай раённай бібліятэкі імя Яна Чачота. Дарэчы, гэты праект атрымаў падтрымку з боку Брэсцкага аддзялення Саюза пісьменнікаў Беларусі.
Асноўным ініцыятарам іх правядзення стала Раіса Раманчук, член Саюза пісьменнікаў Беларусі і Міжнароднай асацыяцыі пісьменнікаў і публіцыстаў, кіраўнік літаратурна-музычнай гасцёўні «Крыніца», якая дзейнічае на базе галоўнай бібліятэкі раёна. Дзякуючы Раiсе Раманчук зноў сабралiся ў Новай Мышы не толькі прыхільнікi літаратурнага слова, але таксама блізкія і родныя майстроў паэтычнага слова Баранавіччыны: Алеся Корнева, Клаўдзіі Трысцень, Івана Монціка і Анастасіі Жук.
Успаміны… Яны пяшчотнай крыніцай ліліся на працягу ўсяго мерапрыемства. З якою цеплыней і павагай гаварылі сын Вадзім, унук Мірон, Марыя Філіпава, Валянціна Бернат і Ніна Бабравіцкая аб Алесю Корневе. З якой любоўю успамінала Анастасію Жук яе дачка Ірына і сябра па пяру Галіна Ліс. З якой пяшчотай адзывалася аб Клаўдзіі Трысцень яе сяброўка Ніна Лешчанка. З якой павагай успамінала аб Іване Монціку яго калега Інна Афанасік.
Словы… Колькі вершаў – непаўторных, лірычных, жартоўных, а галоўнае – шчырых, гучала на працягу мерапрыемства! Яны, а таксама музычныя нумары ў выкананні народнага вакальнага ансамбля «Primavera» стваралі той самы творчы і сардэчны настрой, што заўжды пануе на сустрэчах таленавітых людзей. На працягу мерапрыемства дэманстравалiся i музычныя вiдэазапiсы Алiны Галiцкай, пранiзаныя павагай да роднага краю.
Памяць… Яна бывае розная. Мы памятаем добрыя і сумныя моманты свайго жыцця, людзей, якія тым ці іншым чынам прысутнічалі на нашым жыццёвым шляху. Мы памятаем тых, каго, на жаль, ужо няма побач. І як важна зберагчы гэтую памяць пра людзей, якія нягледзячы на выпрабаванні лёсу здолелі зберагчы ў сэрцы чалавечнасць, а на паперы пакінуць часцінку сваёй душы. Таму, хочацца верыць, што Корнеўскія чытанні будуць працягваць сваю пачэсную справу захавання памяці аб лепшых прадстаўніках Баранавіцкага рэгiёна.
Святлана КРОПАТАВА, загадчык аддзялення выдавецкай дзейнасці ЦРБ імя Яна Чачота
