Прыгожым паэтычным акордам завяршылася першая навучальная чвэрць у бібліятэцы сярэдняй школы № 1 імя С.І. Грыцаўца. З нагоды надыходзячага 140-годдзя Якуба Коласа ў апошні вучэбны дзень чвэрці, 28 кастрычніка, ўсе перапынкі для чытачоў былі не зусім звычайныя – паэтычныя. Праз мэсэнжэр было абвешчана пра акцыю, і ўвесь дзень бібліятэка поўнілася прыхільнікамі роднага літаратурнага слова.

Высокая планка прафесійнага дэкламавання вершаваных радкоў была зададзена выкладчыкам беларускай мовы і літаратуры Ганнай Новік. Вучні з задавальненнем бралі прыклад з настаўніцы і імкнуліся адпавядаць высокаму ўзроўню.

Вучні пачатковай школы аднымі з першых выказалі жаданне прыняць удзел у акцыі. 2 “Е” клас завітаў амаль усім саставам, дзеці з гонарам расказвалі вершы  на памяць. Хлопчыкі і дзяўчынкі ахвотна ўспаміналі знаёмыя з дзіцячага садка радкі пра хлопчыка Алеся, якога кліча рэчка ды цягнуць санкі з дому.

Паэтычныя перапынкі дазволілі канстатаваць не толькі зацікаўленасць вучняў беларускім словам і  добры ўзровень літаратурнага маўлення. Дэкламатары прадэманстравалі не абы-якія артыстычныя здольнасці, калі стваралі перад слухачамі коласаўскія паэтычныя вобразы. Навучэнцы гуртка акцёрскага майстэрства адразу былі прыкметныя ў гэтым плане. Асабліва пасля майстар-класа сваёй настаўніцы – педагога- арганізатара ВольгіКураш.

Мерапрыемства прадугледжвала не толькі паказальнае дэкламаванне вершаў Я. Коласа, але і пытанні вучням пра жыццё і творчасць айчыннага класіка. QR-коды інтэрактыўнай дапоўненай рэчаіснасці былі вельмі дарэчы. Старшакласнікі першымі здагадаліся іх выкарыстаць.

Асабліва цікава было назіраць за вучнямі-сябрамі, якія імкнуліся ўразіць адзін аднаго сваім чытаннем. Трэба адзначыць, што ў многіх гэта на дзіва добра атрымлівалася. І сябрук пазнаваўся з новага, невядомага раней, творчага боку.

Арганізаваная акцыя пацвердзіла, што зусім нездарма трэцяя частка літаратуры, што выдаецца чытачам школьнай бібліятэкі,  – гэта беларускамоўныя кнігі. А незвычайныя школьныя перапынкі сталі адным з дзейсных метадаў далейшай папулярызацыі беларускай літаратуры.  Асалоду пачутай роднай мовы арганічна дапоўнілі салодкія прызы ўсім удзельнікам паэтычных перапынкаў – цукеркі “ад Коласа”.

Н. Баршчэўская, загадчык бібліятэкі