Выхавацелі яслі-сада № 15 правялі літаратурную вечарыну, прысвечаную 125-годдзю з дня нараджэння Максіма Багдановіча.
У мерапрыемстве прынялі ўдзел дзеці сярэдніх і старэйшых груп. Маленькія выхаванцы сумесна з дарослымі падарожнічалі па старонкам жыцця выдатнага беларускага паэта, пазнаёміліся з творчасцю класіка беларускай літаратуры. Пад лірычныя мелодыі прагучалі цудоўныя вершы М. Багдановіча “Зімой”, “Па-над белым пухам вішань”, ”Прыйдзе вясна”. З вялікай цікавасцю дзеці слухалі песню “Слуцкія ткачыхі” ў выкананні выхавацелей, а таксама песню пра Радзіму “Беларусь”, якую падрыхтавала старэйшая група. Таксама дзеці старэйшай групы паказалі невялікі спектакль на аснове твора “Мушка-зелянушка і камарык-насаты тварык”.
Супрацоўнікамі дзіцячага сада была падрыхтавана прэзентацыя аб жыцці паэта, аформлена выстава малюнкаў дзяцей да верша “Зімой”.
Напрыканцы мерапрыемства ўсе прысутныя прынялі ўдзел у беларускіх народных гульнях.
Вельмі важна знаёміць дзяцей з вялікімі творцамі іх Бацькаўшчыны, прывіваць любоў да паэзіі з самага маленства, каб выхаваць у іх павагу да сваёй краіны, жаданне размаўляць на роднай мове і не забываць свае карані.
Марта СТРОКАВА.