Гісторыя – памяць часу. Мінулае ніколі не праходзіць бясследна. Асабліва, калі гэтае мінулае – вайна. Нават калі ты сам не перажыў яе, а ведаеш пра той мужны і суровы час толькі з кніжак, кінафільмаў, успамінаў родных і блізкіх.
Знакавай датай адзначаны 2024 год – 80-й гадавінай вызвалення Рэспублікі Беларусь ад нямецка-фашысцкіх захопнікаў. Вялікая Айчынная вайна адышла ў гісторыю… Але памяць аб ёй працягвае свой шлях. Кожнае новае пакаленне нанава асэнсоўвае гераічныя і трагічныя старонкі мінулага, памятае подзвіг свайго народа ў імя жыцця і будучыні.
7 мая ў цэнтральнай гарадской бібліятэцы імя В. Таўлая адбылося ўрачыстае адкрыццё алеі баранавіцкіх пісьменнікаў “Кніжным радком пра вайну”. Тэма Вялікай Айчыннай вайны і сёння займае адно з цэнтральных месцаў у літаратуры. Да яе неаднаразова звярталіся ў сваёй творчасці беларускія пісьменнікі. Не сталі выключэннем і баранавіцкія творцы.
На 15 стэндах, размешчаных каля бібліятэкі, можна ўбачыць партрэты, кароткія звесткі пра таленавітых землякоў і іх творы, прысвечаныя тэме Вялікай Айчыннай вайны. Кожны стэнд змяшчае QR-код, які дазваляе больш падрабязна пазнаёміцца з жыццём і творчасцю пісьменнікаў нашага горада. Акрамя таго, кожны жадаючы, скарыстаўшыся QR-кодам на першым экране алеі, можа завочна пазнаёміцца з яшчэ большай колькасцю мясцовых творцаў, якія звярталіся да ваеннай тэматыкі. Каласальная работа па літаратурным краязнаўстве была праведзена супрацоўнікамі бібліятэкі для таго, каб гэты праект ажыў на галоўнай вуліцы нашага горада.
Прыемным сюрпрызам для прысутных стала выступленне Паўла Папко – дэпутата Палаты прадстаўнікоў Нацыянальнага сходу Рэспублікі Беларусь.
Ганаровымі гасцямі сустрэчы, безумоўна, сталі баранавіцкія пісьменнікі, творы якіх упрыгожылі літаратурную алею: Ларыса Антонава, Аляксей Белы, Галіна Ліс, Юрый Мазалевіч, Ірына Мезенцава, Наталля Несцярук, Раіса Раманчук, Таццяна Смаляк, Міхаіл Стрыжоў, Марыя Філіпава, Анатоль Хвайніцкі, Людміла Шувалава, Таццяна Яцук. Празаічныя, вершаваныя і музычныя творы таленавітых землякоў прагучалі ў аўтарскім выкананні і стварылі непаўторную атмасферу надыходзячага свята – Дня Перамогі.
На сустрэчы прысутнічалі навучэнцы Баранавіцкага тэхналагічнага каледжа і Баранавіцкага дзяржаўнага каледжа машынабудавання. Для маладога пакалення творы пісьменнікаў-землякоў гучалі своеасаблівым заклікам да мірнага жыцця, да жыцця без вайны.
Надзея КІПЕЛЬ, вядучы бібліятэкар аддзела абслугоўвання і інфармацыі ЦГБ імя В. Таўлая
Фота Алены АЛЬПЯРОВІЧ, бібліёграфа І катэгорыі ЦГБ імя В. Таўлая
