Несумненна, многія з населенных пунктаў нашай шчодрай на таленты Беларусі могуць пахваліцца знакамітымі землякамі, імя якіх прагучала і працягвае гучаць не толькі ў нашай краіне, але і далека за яе межамі. Цэнтральнай раённай бібліятэцы, якая знаходзіцца на тэрыторыі вескі Новая Мыш таксама пашанцавала. Менавіта тут прайшло дзяцінства нашага знакамітага земляка, паэта-рамантыка, філамата і філарэта, фалькларыста, этнографа і драматурга, аднаго з найбуйнейшых дзеячаў беларуска-польскага фальклорна-літаратурнага сумежжа XIX ст. – Яна Чачота, 225-годдзе са дня нараджэння якога мы святкуем 7 ліпеня.

Значэнне яго ўклада ў культуру нашага народа цяжка пераацаніць. Нягледзячы на тое, што з моманту яго актыўнай дзейнасці прайшло ўжо шмат год, яго творчая спадчына застаецца актуальнай і зразумелай любому беларусу. Магчыма ад таго, што ён сам, выхадзец з народу, разумеў і прымаў асаблівасці жыцця, думкі і пачуцці простага чалавека і праз свае вершы, балады, фальклорныя і публіцыстычныя матэрыялы імкнуўся данесці ўсё гэта да сваіх суайчыннікаў. Але ўклад Яна Чачота ў станаўленне і развіцце беларускай культуры быў настолькі велькім, што і мы, яго нашчадкі, можам многае пачарпнуць, даведацца і зразумець, зазірнуўшы ў зборнік яго твораў.

Менавіта з мэтаю ўшанавання памяці знамянітага земляка супрацоўнікі бібліятэк, чытачы, прадстаўнікі Навамышскага сельскага савета і Навамышскага дэпутатскага корпусу ўсклалі кветкі ля помніка Яну Чачоту, што стаіць у парку вескі Новая Мыш.

А для больш глыбокага знаемства з яго творчай спадчынай ДУК “Баранавіцкая раённая цэнтралізаваная бібліятэчная сістэма” ініцыіравала правядзенне агляду-конкурсу “Ян Чачот. Паэт. Публіцыст. Фалькларыст.” Удзельнікамі яго сталі чытачы і супрацоўнікі бібліятэк нашага раёна. Творчыя работы прымаліся па трох намінацыях: “Выстава-агляд”, “Творчае заданне” і “Мультымедыйны прадукт, альбо друкаванае выданне”.

Трэба адзначыць, што ўдзельнікі праявілі амаль аднолькавую актыўнасць у кожнай з іх. Канкурсанты, якія вырашылі праявіць сябе ў якасці таленавітых чытальнікаў, расказвалі вершы і ўрыўкі з балад Яна Чачота. Асабліва прыемна, што выходзілі на сцэну людзі самага рознага ўзросту, ад малодшых школьнікаў да людзей, што знаходзяцца на заслужанным адпачынку.

Для ўдзелу ў намінацыі “Мультымедыйны прадукт, альбо друкаванае выданне” неабходна было даслаць для дэманстрацыі буктрэйлер, відыяролік альбо прэзентацыю, якія тычацца жыцця і творчасці нашага земляка. Асаблівая ўвага надавалася распрацоўцы фірменнага знаку з выкарыстаннем выявы Яна Чачота. І нягледзячы на тое, што работы былі розныя і па манеры выканання, і па спосабу данясення матэрыялу, было зразумела, што кожны канкурсант прыклаў шмат намаганняў пры стварэнні сваёй мультымедыйнай, альбо друкаванай прадукцыі.

У намінацыі “Выстава-агляд” па-за конкурсам свой матэрыял прадставіла Цэнтральная раённая бібліятэка імя Яна Чачота. А паглядзець там было на што! Акрамя традыцыйных літаратурных выданняў, увазе прысутных былі прадстаўлены: вімельбух, філворды, гульні для детей малодшага школьнага ўзросту, коміксы, буклеты, бібліяграфічныя дапаможнікі і г.д.

Журы у складзе супрацоўнікаў ЦРБ ім. Яна Чачота, падводзячы вынікі конкурсу, размеркавала месцы наступным чынам:

Намінацыя “Творчае заданне”

3 месца – Нагорная Ірына Мікалаеўна (загадчык Маласваротаўскай бібліятэкі-музея);
2 месца — Хвалька Марыя (чытачка Карчоўскай сельскай бібліятэкі);
1 месца — Лайша Данііла (чытач Жамчужненскай сельскай бібліятэкі).

Дарэчы, Данііл так спадабаўся гасцям свята, што атрымаў прыз глядацкіх сімпатый.

У намінацыі “Мультымедыйны прадукт, альбо друкаванае выданне” пераможцамі сталі:

3 месца – Лаўрынавіцкая і Вольнаўская сельскія бібліятэкі;
2 месца – Маўчадская і Прыазернаўская сельскія бібліятэкі;
1 месца – Сталовіцкая і Перхавіцкая сельскія бібліятэкі.

У намінацыі “Выстава-агляд” пераможцы не вызначаліся.

Напрыканцы мерапрыемства, уручая дыпломы і падарункі не толькі пераможцам, але і ўсім удзельнікам конкурсу, дырэктар Баранавіцкай РЦБС Таццяна Міхайлаўна Лайша падзякавала як супрацоўнікаў бібліятэк раёна за творчы падыход да выканання конкурсных заданняў, так і выканаўцаў Навамышскага сельскага дома культуры, якія дарылі добры настрой сваімі музычнымі нумарамі. А яшчэ яна адзначыла, што постаць Яна Чачота з’яўляецца адным з аплотаў беларускай культуры і народнасці, а значыць, памяць аб ім і яго творчай спадчыне застанецца з намі, беларусамі, яшчэ на доўгія-доўгія гады.

Загадчык аддзела выдавецкай дзейнасці Святлана Кропатава